رواية شهر زاد وقعت في حب معاق بقلم شهد محمد كامله
شيلت القصه تاني في شنطتي واتنهدت وسرحت ب خيالي في السما
بيبقا اسوء وقت لما بسيب نفسي ل دماغي بفكر في حاجات كتير اوي بفكر في اللي ظلموني والي زعلوني وكل ذكرياتي الوحشه بقالي فتره بحاول انسى اللي حصلي في القريه بس دماغي مش سايبني في حالي
ومن كتر التفكير محستش ب الوقت لدرجة اني فوقت على صوتو وهو بيقول:
_يلا وصلنا
بصيت ليه وانا مبتسمه وعيني بتلمع
_يعني احنا كدا في تركيا؟
_امم
مجاش في بالي غير الكوميك بتاع إن البنت اتجوزت ثري عربي وخليته يوديها شهر عسل في تركيا واول ما نزلو من الطياره قالتلو طلقني
بصيت ليه وانا مبتسمه وكلي حماس وقولتلو:
_طلقني
رفع حجبه وبصلي ب استغراب وهو بيقول:
_نعم !!
_لاء لاء انا اسفه والله بس عشان لسه صاحيه مفوقتش اسفه جدا
_حصل خير هاتي رونزي ويلا
_حاضر
خدت رونزي في إيدي ومشينا وراه كان فيه كذا حد بيساعده يخرج من الطياره لاكن كان باين عليه انه مضايق مش عايز حد يساعده مش عايز الناس تتعامل معاه على انه عاجز !
نزلنا من الطياره وركبنا العربيه مع مساعدة الشباب برضو وشويه ووصلنا للبيت اللي هنعيش فيه
كنت مستمتعه بكل حاجه في البلد الأجواء تجنن
البيت زاي اللي بنشوفو في المسلسلات بظبط قطع اندماجي مع تفاصيل البيت صوتو وهو بيقول:
_طلبت اكل شويه وهيجي على هنا ودلوقتي تجهزي اوضتك انتي ورونزي
_واوضة حضرتك!
_هعملها لنفسي لما اجي حاليآ انا ورايا اجتماع مهم متتحركيش من مكانك لحد ما اجي
_حاضر
مشي هو وسابني انا في بيت أحلامي جهزت اوضتي واوضة رونزي زاي ما قال والاكل جيه كلت انا ورونزي وحكتلها بقيت الحدوته ونامت في نصها زاي كل مره
